Azərbaycanda ilk dəfə art-terapiya vasitəsilə insanların müalicəsinə başlanılıb.
Bunu Səhiyyə Nazirliyinin Psixi Sağlamlıq Mərkəzinin direktoru Zəfər Əliyev bildirib. Onun sözlərinə görə, art-terapiyanın məqsədi istənilən incəsənət növləri ilə insanların psixikasına müəyyən qədər təsir göstərməklə onları müalicə etməkdir.
Art-terapiya psixi pozuntusu olan xəstələrin müalicəsində istifadə edilir. Mərkəz bu ilin yanvar ayının 10-dan fəaliyyətə başlayıb.
Psixi Sağlamlıq Mərkəzinin psixoloq, art-terapevti Elnarə Baxışlı bildirib ki, art-terapiyanın bir sıra növləri mövcuddur və art terapiya müasir fitoterapiyanın növlərindən biri hesab olunur. Bu müalicə növünün məqsədi pasiyentləri danışdırmadan onların problemlərini üzə çıxarmaq və onların stress, halını yüngülləşdirməkdir.

Azərbaycanda 0-3 yaşlarında anadangəlmə əlil uşaqların sayı 2011-ci ildə 37 faiz artıb. Bu barədə Milli Məclisin (MM) Sosial siyasət Komitəsinin iclasında Komitə sədri Hadı Rəcəbli məlumat verib. O, bunun ciddi və düşündürücü göstərici olduğunu bildirib.

İclasda iştirak edən respublikanın baş pediatrı Nəsib Quliyev və deputat Yaqub Mahmudov 0-3 yaşlarında anadangəlmə əlil uşaqların sayının artması ilə bağlı rəqəmlərdən narahatlıqlarını ifadə ediblər. Deputat deyib ki, Azərbaycanda "Yeyinti məhsullarının tərkibinin zənginləşdirilməsi haqqında" qanun qəbul edilməlidir.

Azərbaycanda ilk dəfə olaraq, qaraciyər və böyrəyin transplantasiyası eyni anda həyata keçirilib. Bunu Azərbaycan Səhiyyə Nazirliyinin Mərkəzi Neftçilər Xəstəxanasının baş həkimi Həbib Yüzbaşıyev deyib.

Onun sözlərinə görə, hər iki orqanın transplantasiyası bir əməliyyatla yerinə yetirilib. Cərrah-həkim Mircəlal Kazımi, Eldar Əhmədov, Elnur Fərəcovun iştirakı ilə keçirilən əməliyyat 24 saat davam edib.

Səhiyyə Nazirliyinin İctimai Səhiyyə və İslahatlar Mərkəzində (İSİM) fəaliyyət göstərən diabet məktəbində fevralın 20-dən 25-dək şəkərli diabet xəstələri üçün pulsuz təlimlər keçirilir.

Səhiyyə Nazirliyinin mətbuat xidmətindən bildirmişlər ki, fevralın 27-dən martın 3-dək isə risk qrupuna aid əhali üçün pulsuz təlimlər təşkil olunacaqdır.

Təlim zamanı şəkərli diabet haqqında məlumat, özünənəzarət vasitələrindən istifadə qaydaları, düzgün qidalanma, diabetin fəsadları və s. mövzularla bağlı bilik və bacarıqlar əldə olunacaqdır.

Dünyanın bir çox ölkələrində, o cümlədən Azərbaycanda “Rozeqlikazon” və “Sibutramin” dərmanlarının satışı qadağan edilib.
Bu barədə Səhiyyə Nazirliyinin Dərman Vasitələrinin Analitik Ekspertiza Mərkəzindən məlumat verilib.

Hər iki dərmanın ləğvi onların orqanizmə mənfi fəsadları ilə bağlıdır.
Artıq səhiyyə naziri Oqtay Şirəliyev bu dərmanların ölkə ərazisində istifadəsinin dayandırılması və satışdan yığışdırılması barədə əmr verib.

BMT dünyanın səhiyyə baxımdan ən böyük bəlalarından olan QİÇS-ə dair yeni hesabat təqdim edib.
Qurumun HİV/QİÇS Proqramı nikbin statistik hesabatla çıxış edərək, QİÇS-dən ölənlərin və yoluxanların sayının kəskin şəkildə azaldığını bəyan edib.
Hesabata əsasən qeyd edilən yoluxucu xəstəlikdən ölənlərin sayı 2005-ci ilə nisbətən 21% aşağı düşüb.
İnkişaf etməkdə olan ölkələrdə tibbi müayinə və müalicənin gücləndirilməsi, o cümlədən müvafiq tibbi preparatların xəstələrə vaxtında çatdırılmasını HİV/QİÇS-dən ölüm hallarının azalmasına təsir edən əsas amillər kimi qeyd edilib.

Gürcüstan Xəstəliklərə Nəzarət Milli Mərkəzinin məlumatına görə, son bir həftədə ölkədə QİÇS virusundan 3 nəfər ölüb.
Xəstəlikdən ölənlərin 2 nəfəri kişi, biri qadındır. Onların hər üçünün yaş həddi 50-dən aşağıdır. Mütəxəssislər Gürcüstanda QİÇS-ə yoluxma hallarında artım müşahidə olunduğunu bildirirlər.

Azərbaycanda da vəziyyət heç də ürəkaçan deyil. 2011-ci ilin ilk 6 ayı ərzində Azərbaycanda İİV-ə yoluxması yeni aşkar olunan insanların sayı 303 təşkil edib. Onlardan 298-i (98,3%) Azərbaycan vətəndaşı, 5 nəfəri (1,7%) isə əcnəbi vətəndaşdır. Bu dövr ərzində İİV-infeksiyasından 23 nəfər Azərbaycan vətəndaşı dünyasını dəyişib.

Azərbaycan Respublikası Səhiyyə Nazirliyinin təşkilatçılığı ilə 13 oktyabr 2010-cu il tarixində Xızı Mərkəzi Rayon Xəstəxanasında könüllü qanvermə aksiyası keçirilmişdir.

Aksiya zamanı 135 nəfər könüllü olaraq qan vermişdir. Tədarük olunan qan və qandan hazırlanan preparatlardan hemofiliyalı və talassemiyalı, həmçinin qana ehtiyacı olan bütün xəstələrin müalicəsində istifadə olunacaqdır.

Aksiyada iştirak edən bütün insanlara dərin təşəkkürümüzü bildiririk!

Ümumdünya Səhiyyə Təşkilatı (ÜST) dünya ölkələrində qeyri-keçici xəstəliklərin (diabet, xərçəng, ürək xəstəliyi, insult) yayılmasına dair illik hesabatını açıqlayıb.
APA-nın Birləşmiş Millətlər Təşkilatının saytına istinadən verdiyi məlumata görə, hər il 60 yaşına çatmamış milyonlarla insan bu xəstəliklərdən dünyasını dəyişir. ÜST-nin yeni hesabatı 193 ölkəni əhatə edib.
Sənədin Azərbaycana aid bölməsində bildirilir ki, indi ölkədə dünyasını dəyişən şəxslərin 85 faizi məhz diabet, xərçəng, ürək və ağ ciyər xəstəliyi, insult və digər qeyri-keçici xəstəliklərdən ölür.

Dünya Səhiyyə Təşkilatı ( DST) Rusiya, Ukrayna və Azərbaycanı bir sıra digər Şərqi Avropa ölkələri ilə yanaşı dərmanlara davamlı vərəmin ən geniş yayıldığı ölkələr sırasına daxil edib.

Dərmanlara davamlı vərəmin adi vərəmdən fərqi dərmanlar vasitəsilə müalicəsinin demək olarkı mümküns olmasıdır.
Vərəm xəstəliyinə tutulma statikası baxımından Qərbi Avropada ən ağır vəziyyət Britaniya paytaxtı Londonda yaranıb.

DST bildirir ki, hər il Avropada dərmanlara qismən və geniş sürətdə davamlılıq göstərən vərəm növünə 81 mindən artıq adam yoluxur.

Sentyabr ayının 13-dən 15-dək Azərbaycan Respublikasının paytaxtı Bakı şəhərində 17-ci illik Azərbaycan beynəlxalq səhiyyə sərgisi ("BIHE") keçiriləcək. Tibb və səhiyyə sahəsində regionun yeganə nüfuzlu ekspo-tədbiri olan "BIHE" sərgisi dövlət qurumlarının nümayəndələri, tibbi təyinatlı avadanlıq və ləvazimatların istehsalçıları, təcrübə keçən həkimlər və tibb sənayesinin mütəxəssisləri üçün əhəmiyyətli görüş yerinə çevrilmişdir. Beynəlxalq səhiyyə sərginin sentyabr ayında keçirilməsi artıq bir ənənəyə çevrilib və təkcə paytaxtda deyil, həm də Azərbaycanın regionlarında səhiyyə islahatlarının həyata keçirilməsi fonunda xüsusi aktuallıq kəsb edir. Bu tədbirin yüksək statusunu təsdiq edən amillərdən biri "BIHE" sərgisinin Azərbaycan Respublikası Səhiyyə Nazirliyi, Azərbaycan Stomatoloji Assosiasiyası, Azərbaycan Respublikası Sahibkarlar (İşəgötürənlər) Təşkilatları Milli Konfederasiyası və Azərbaycanda İxracın və İnvestisiyaların Təşviqi Fondunun (AZPROMO) dəstəyi ilə keçirilməsidir. Artıq 5 ildir ki, "BIHE" sərgisi Ümumdünya sərgi sənayesi assosiasiyasının (UFI) keyfiyyət nişanına malikdir.

Azərbaycan qanunvericiliyinə uyğun olaraq ölkənin səhiyyə sistemində fəaliyyət göstərən yaşı 65-i keçmiş 7100 nəfərdən təqribən 3000-3500 nəfəri (50 faiz) işdən azad edilib. Bunu Ümumdünya Səhiyyə Təşkilatının regional komitəsinin Bakıda təşkil olunacaq 61-ci sessiyası ilə bağlı keçirilən mətbuat konfransında Azərbaycan səhiyyə nazirinin müavini Elsevər Ağayev bildirib.

Qanunun tətbiqi zamanı bəzi meyarların nəzərə alındığını bildirən Elsevər Ağayev ucqar kənd yerlərində və ehtiyac olan yerlərdə yaşı 65-i keçmiş şəxslərin işləməsinə hələlik imkan verildiyini söyləyib.