Dünya Bankının dəstəyi ilə “Səhiyyə sektorunda islahatlar” adlı yeni normativlər hazırlanıb.
Bu gün Səhiyyə Nazirliyi aparatının kollegiya iclası keçirilib. Tədbirdə səhiyyə sistemindəki problemlər və bu sahədə aparılmalı olan islahatlar müzakirə olunub. İclası giriş sözü ilə səhiyyə naziri Oqtay Şirəliyev açıb.

Nazir çıxışında bildirib ki, sovet hökumətinin dağılmasına baxmayaraq, səhiyyə sistemində bəzi köhnə normativlər hələ də qalmaqdadır: “Ancaq indi köhnə normativlərlə işləmək məqsədəuyğun sayılmır. Ona görə də Dünya Bankının dəstəyi və bir sıra xarici ölkələrin mütəxəssislərinin yardımı ilə yeni normativ sənədlər hazırlanıb”.

Nazirliyinin kadrlar, elm və təhsil şöbəsinin müdir müavini Rauf Ağayev isə həkim ixtisasları və vəzifələrin nomenklaturası barədə danışıb. O, Azərbaycan səhiyyəsinin dünya standartlarına uyğun inkişaf etdirməyin, bu sahədə dünyanın qabaqcıl ölkələrinin təcrübəsinə inteqrasiya olunmağın əsas vəzifəyə çevrildiyini deyib: “Bu baxımdan çox vacib və mühüm məsələlərdən biri həkim ixtisaslarını Avropanın və Amerikanın inkişaf etmiş ölkələrində qəbul olunmuş reyestrə maksimal uyğunlaşdırmaq, yaxın gələcəkdə qəbul ediləcək Təhsil Proqramına müvafiq formada qurmaqdır. Bununla bağlı Səhiyyə Nazirliyi Dünya Bankının səhiyyədə islahatlar layihəsi ilə bağlı sənədlər hazırlayıb”.

Tibbi yardımın təşkili şöbəsinin müdir müavini Adil Kərimov isə səhiyyəyə ayrılan maliyyə vəsaitinin səmərəli istifadə edilməsinin vacib olduğunu deyib. Onun sözlərinə görə, buna nail olmaq üçün perspektivsiz, bir-birini təkrarlayan, rentabelliyi az olan və səmərəsiz fəaliyyət göstərən tibb müəssisələrinin ixtisarına, çarpayı fondunun azaldılması və əhalinin real tələbatı nəzərə alınaraq səhiyyə strukturunun optimallaşdırılmasına ehtiyac var: “Azərbaycanda həkimlərin sayı Avropa göstəricilərinə uyğun olsa da, xəstəxanaların çarpayıları demək olar ki, 2 dəfə artıqdır. Yaxşı halda onların 35-40 faizindən istifadə olunur. On illərlə gedən ekstensiv inkişaf nəticəsində çox böyük xəstəxana şəbəkəsi yaranıb və hazırda bunu saxlamaq çətindir. Bu, həm də iqtisadi cəhətdən əlverişli deyil. Bütün bunlar son nəticədə dövlət vəsaitinin boş yerə xərclənməsinə səbəb olur, texniki və texnoloji baxımdan təchiz edilmiş müasir, prinsipcə yeni tipli və formatlı stasionar müəssisələrin inkişafını ləngidir”.

Onun sözlərinə görə, hazırda səhiyyəyə ayrılan ümumi xərclərin həcminin təxminən 65 faizi stasionar tibbi yardımın payına düşür. Avropa ölkələrində isə bu göstərici 30-35 faizdir. İlkin tibbi-sanitariya yardımı göstərən həkimlər bütün həkimlərin sayının cəmi 20-25 faizini təşkil edir ki, bu da inkişaf etmiş ölkələrlə müqayisədə 2 dəfə aşağıdır.

Kollegiya iclasında qeyd olunub ki, səhiyyə islahatları çərçivəsində çarpayıların ixtisarı, həkimlərin düzgün yerləşdirilməsi, onların ixtisaslarının dəyişdirilməsi və ümumi profilli həkimlərin (ailə həkimlərinin) hazırlanması istiqamətində iş aparılmalıdır. Bununla əlaqədar olaraq, Səhiyyə Nazirliyinin mütəxəssisləri tərəfindən Dünya Bankının dəstəyi ilə həyata keçirilən “Səhiyyə sektorunda islahatlar” adlı layihədə beynəlxalq ekspertlərin tövsiyələri də nəzərə alınıb. Əhalinin xəstəxana çarpayıları və tibb kadrları ilə təminatını müəyyənləşdirən yeni say hədləri hazırlanıb.

Adil Kərimov bildirib ki, həkimlərin mövcud sayı ilə nəzərdə tutulan say arasında ciddi fərq yoxdur. Orta tibb işçiləri vəzifələrinin isə hətta artımı gözlənilir.

Çıxışların sonunda nazir Oqtay Şirəliyev qəbul olunmuş sənədin əhəmiyyəti, onun üstünlüklərinə dair öz fikirlərini kollegiya iştirakçılarının diqqətinə çatdırıb